I jornade de primavera del FAI
Scritto da Simona ScuriAnca quest ann el 21 e el 22 de marz 2015 el FAI l'organiza "I jornade de primavera", cont 780 sits verts al publeg, grazia ai so 115 delegazion in Italia, i so 100 mila inscrits e donador e i so 7.000 volontari.
El FAI a l'è una famosa fondazion, qe la opera grazia al sostegn dei citadin, dei aziende e dei istituzion per tutelar, conservar e valorizar el patrimoni artisteg, storeg e natural del paesaj italian dal 1975.
La fondazion a l'è proprietaria e la jestiss 50 sits, intra i quai 30 regolarment verts al publeg.
60.000 inn i meter quader de palaz storeg tutelads, 30.000 i liber antig, 19.000 i ojets d'art, plussee de 5 million i meter quader de paesaj protejud e plussee de 2 million de meter quader de bosc e jardin tutelads.
Una iniziativa particolarment interessanta qe el FAI l'organiza da 10 ann a l'è anca el cens "I sits del cœr". Dex i sits qe pœden vesser premiads.
L'idea, promovuda dal FAI e da Banca Intesa, a l'è qella de segnalar i sits particolar qe podarien haver-g besogn de aiut per vesser protejuds.
I sits inn part del patrimoni material qe al costituiss la nosta identitaa e i nostre radix, çasqedun, naturalment, ind la soa rejon d'apartenenza.
Cont la tœta dei firme e dei vots online per "I sits del cœr", i sits vincidor pœden far domanda de intervent in su la bas de un projet concret de salvaguardia.
Quest ann, intra i plussee de 20.000 sits da votar, ge n'era anca vun in provinça de Milan : Villa Alar Viscont de Cernusc in sul Navili (MI) qe, cont asquas 29.000 vots, a l'è rivad a posizionar-s intra i prim dex.
El vincidor al prim post, grazia anca a tuts i turista consepevol, a l'è stait el Convent dei Frads Capucin de Montross al Mar (La Spezia). Interessant anca descovrir, al quart post, el Musee del Capell Borsalino de Lissandria (AL) e al post dei dodex (ma purtropp minga vincidor) l'organ Antegnati ind del Dom Vegg de Bressa (BS) un organ del 1536 cont milla-trexent cane.
I sits qe g'hann havud un aiut in tuta Italia, in dex ann, inn staits 45 :
la Lombardia la g'ha el numer plussee grand, adiritura 9.
Veder un sucess del FAI compagn de qest qì a l'è strabell e mi speri qe un dì anca el Comitad Salvaguardia Patrimoni Lenguisteg (CSPL) al podarà haver-g dei grands resultads tant mè quei del FAI.
In Lombardia el CSPL se ocupa de qell patrimoni inmaterial qe l'è la nosta lengua lombarda, qe la costituiss la nosta identitaa e i noster radix, una lengua da tutelar, conservar e valorizar.
*Simona Scuri
Coordinament Lombardia
Comitad Salvaguardia Patrimoni Lenguisteg
Foto: Villa Alari Visconti, Cernusc in sul Navili (Mi)